Bordienea Etxea

XVIII. mendean egindako jauregi moduko hau nahiko hondatua dago aspalditik. Teilatua lau isurkikoa da eta bi fatxada ditu hagitz estilo desberdinetan eginak. Fatxada batean, lehenago zurezko balkoi ederra zegoela  ikusten da. Bertze fatxadak harrizko lan bereziak ditu;  haien artean, ekialdeko  leiho okerra eta Onin erreka gainean irteten den  komuna.
 Bordienea egin zuen arkitektoa Lesakako eliza jasotzeko kontratatzeko asmotan ibili ziren baina, azkenean, bertze bati eman zioten lan hori. Arkitektoak elizarako ekarriak zituen harriekin Bordienea eraiki zuen.
Harrizko komunaren gaineko aldea elizako kupula erdia bezalakoa da eta bide aldera dagoen paretan egina kupularen bertze erdia.
Lan hauekin arkitektoak adierazi nahi zuen herritarrak ez onartu arren, bazuela gaitasuna eliza bat eraikitzeko.
Barruan ikusgarria da teilatu azpiko zurezko egitura. Hainbat lekutako arkitektoak etorri izan dira zur lan hau aztertzera.

 

Lesakako Tantirumairu Ikastolako ikasleek egina.