Miserikordia Kalea

Alde zaharreko kale hau Tafallako esanguratsuenetariko bat da historiaren ikuspuntutik begiratuta. Hiru eraikinek pizten dute arreta:
Lehena, Miserikordia Kutxa zuena, eta hortik datorkio izena. Ramirez de Acedok 1595. urtean emandako 3.000 dukatekin eratu zen kutxa, nekazari txiroak laguntzeko. Hurrengo urtean etxea eraiki zen, oraindik dirauen armarrian ikus daitekeen bezala.
Bigarrena udaletxe zaharra da. Bertan Udala eta auzotarrak biltzen ziren batzarreak egiteko 1656 arte. Urte horretan egungo Foru Plazara eraman zen eta 1859. urtean oraingo lekura.
Hirugarrenean hiriko espetxea egon zen 1656 arte, eta bertan sei hilabetez preso egon zen Joan Amendux idazleak euskal bertso zaharrenetarikoak idatzi zituen 1567an.

 

Tafallako Garcés de los Fayos Ikastolako ikasleek egina.