Laidako Zubia

Laidako zubia (Irunberri, x: 638.310 y: 4.723.521): Irati ibaiaren gainean (Laida izena hartzen zuena lur hauek zeharkatzerakoan) eraikitako zubia Judasko Bentetarako sar-irteera nagusia izan da Iruñerako bidean. Ziur aski Erdi Aroan eraikia, 60 metroko kanoi gangako zubiak erdi puntuko lau arku ditu eta zutabeetan Iratiko uren indarra apaltzeko zubi-bularrak. Espoz y Mina Idozindarrak 1811. urtean eraitsi egin zuen arkuetako bat, ibaiaren ezkerreko ertzean babestuta zeuden tropa frantsesei bidea mozteko. 1950ean berriz, ibilgailuen zirkulaziorako egokitu zen, kaltzada zabalduz eta gaur egungo itxura hartuz.