Abstraktua, puntilismoa, kubismoa, mandalak... Teknika desberdinak ikasi ondoren artelan galeria bat egin nahi dugu ikastolan. Baina hori baino lehen artearen munduan gehiago murgiltzeko Begoña Durruty marrazkilari arizkundarra gonbidatu dugu gelarat.
Nola hasi zinen marrazten?
Harri bat edo kisu zati bat hartu eta paretetan edo lurrean marrazten nuen. 5-7 urterekin hasi nintzen.
Non ikasi zenuen marrazten?
Nire kabuz ikasi nuen. Ez nituen Arte ederrak ikasi. Nire bidea intuizioz egin dut, Baztango hainbat margolarirekin prestakuntza jasoz, liburuak irakurriz eta Internetez.
Zer material erabiltzen duzu marrazteko?
Material desberdinak probatzea gustatzen zait eta haueki ibiltzen naiz:oleoa, akuarelak, arkatzak, karbonzilloa, tinta txinatarra, linoleoarekin estanpazioa, grabatuak….
Nolako artelana izan zen lehendabizikoa?
Uf ez naiz oroitzen. Nire burua zirriborrogile bezala dut. Eskua altxatu gabe marraztea gustatzen zait.
Txikitan zer pentsatzen zenuen izatea handitan?
Betitik marrazketa gustatu zait baina baita kirola egitea ere. Orduan, kirol ikasketak ikasi nituen.
Zenbat urterekin hasi zinen profesionalki marrazkiak egiten?
Urte batzuez gorputz heziketako irakasle izan nintzen ikastetxe desberdinetan, baina 35 urterekin irakaskuntza utzi eta marrazten hasi nintzen.
Zerk erakarri zizun arterat?
Ba…nire izaerak. Aunitz gustatzen zait artea, antzerkia egitea, kantatzea….
Zer erraten zizuten etxekoek marrazketari buruz?
Ez zidaten kasu aunitzik egiten eta ez zitzaien arras garrantzitsua iruditzen eta nahiago zuten bertze ikasketa batzuk egitea nire etxekoek.
Zer estilo erabiltzen duzu marrazterako orduan?
Ahal izanez gero zirriborroak egiten ditut gehien. Ez dut berexiki estilo bat maite, denak gustatzen zaizkit.
Nola asmatzen dituzu marrazkiak?
Kanporat ateratzen naizelarik edo leihotik begiratzen dudalarik gauzak behatu eta ideiak etortzen zaizkit bururat. Nire xokoan inguruan behatzen aritzen naiz. Baita ere, irakurtzen dudana irudikatzen dut.
Non egiten dituzu zure marrazkiak?
Etxean badut txoko ttiki bat. Egunero, inork molestatu baino lehen goizik ernatzen naiz eta nire xokora joaten naiz marrazterat.
Zenbat liburu ilustratu dituzu?
10 liburu guti goiti beheiti. Horien artean hemen dituzuen bi: Belarriko kilkerrak Uxue Alberdik idatzitakoa eta Amaiur Amaia Elizagoienena.
Haurrentzako liburuen artean: Mozoloaren bakardadea, Sekretuaren lapurrak eta Mitxitxi Marriau, Erein argitaletxeak argitaratutakoak ilustratu ditut.Ez da konprenitzen ahal gerra! eleberri grafikoa ere ilustratu eta idatzi nuen. Cherche`pas à comprende!“ bertan aitaren historia kontatzen dut, Denonartean argitaletxean argitaratua. Liburuan, gure herrialdearen oroimenean gordeta gera daitezen, aurreko mendean Frantzia eta Espainia banatzen dituen mugan izandako gerrak kontatzen ditut, bertan bizi ziren familiei eragin ziena. Bereterretxeren kanthoria. Anonimoa da, XV. mendekoa (1434-1449). 1917an ilustratu nuen eta Denon artean argitaletxeak argitaratu zuen.
Zein izan da gehien kostatu zaizun artelana?
Oraindik akitu ez dudan liburu bat. 5 urte daramatzat komiki bat egiten. Ordenagailuz egiten ari naiz.
Zure lanen batengatik sariren bat irabazi duzu?
2006an Baztango aire zabaleko lehiaketan saria irabazi nuen eta 2009an Bertizko Turismo Partzuergoaren lehiaketa irabazi nuen antzara-jokoaren antzerako bat ilustratzeagatik.
Elkarrizketa interesgarria eta aberatsa izan dugu Begoñarekin. Gainera, hainbat marrazki egin dizkigu arbelean. Horien artean Belarriko kilkerrak liburuko marrazki batzuk. Eta ez dugu ahaztuko esaldi hau: “Amatati kaja horiek” eta bere erranahia: gaur egun jendarteak duen pantailekiko menpekotasuna. Akitzeko, sinadura eskatu eta gure buruaren marrazki edota karikaturak egin dizkigu. Irrimangarria izan da momentu hori!
_20191009131205Log.jpg)
