San Fermin Ikastolak, 2023an, Elkarri Begira lantaldea sortu zuen, zenbait familiak pantailen erabilerarekiko zuten kezkari erantzuteko. Lantalde hori Ikastolako Artezte Batzordearen oniritziarekin hasi zen lanean, helburu argi batekin: gai honi irtenbideak eta ikuspegi bateratuak bilatzea. Hala ere, taldeak hartu duen dimentsioa ikusita, egitura iraunkor baten beharra identifikatu da, eta pantailen erabilera aztertzeko batzorde berri eta iraunkorra sortu da.
Batzorde berri honetan Ikastolako zuzendaritza, Orientazio Mintegia, Artezte Batzordeko ordezkariak eta hainbat guraso ari dira parte hartzen. Helburu nagusia pantailen erabileraren inguruan ikastolako komunitate osoarentzako errealitate digitalera egokitutako estrategia orekatu eta eraginkorra garatzea da. Horretarako, lan ildo batzuk ere definitu ditu. Lehenik eta behin, komunitate osoaren erradiografia egiteko pausoak eman dira; gure komunitateak gailu digitalen aurrean duen harremana sakon ezagutzeko bi galdetegi egin dira: bata familiei eta bestea langileei zuzendua. Emaitzek digitalizazio-plan orekatua garatzen lagunduko dute, ikasleen garapen pedagogikoa eta teknologikoa orekatzen dituzten neurriak proposatuz.
Bestetik, pantailen erabileraren inguruko hausnarketa eta prestakuntza bultzatzea da batzordearen bigarren lan-ardatza. Horren adibide dugu, joan den azaroaren 25ean Marta Santarenek emandako hitzaldia. Psikologian aditua eta unibertsitateko irakaslea den Santarenek familiei nerabeen eta haurren pantailen erabilerak izan ditzakeen eragin psikologikoei buruz hitzegin zuen, bai eta familiek arlo honetan egin dezaketen lan handiari buruz ere.
Elkarri Begira lan taldearen lehenengo esperientziak erakutsi duenez, digitalizazioa etengabeko egokitzapena eskatzen duen errealitatea da. Ildo horretan, ikastolako komunitate osoak konpromiso iraunkorra behar du, pantailen erabilera osasuntsua bultzatzeko eta ikasleen garapen osoa bermatzeko.
IKASTOLAK HARTUTAKO NEURRIAK
Ikastolako IKT taldeak, bestalde, DBHko 1. eta 4. mailen artean ikasleek Chromebookak erabiliz internetera nola konektatzen diren aztertu du. Emaitzek hainbat ondorio interesgarri utzi dituzte, eta horien araberako neurri zenbait hartu dira. Adibidez, azterketak erakutsi du internetera sartzeko joera nabarmen handiagoa dela eskola-ordutegitik kanpo (14:20-23:00) eskola-orduetan baino (08:10-14:20). Gainera, Gero Bat Gugan 2030 hezkuntza-eraldaketa prozesua hasi zenetik interneterako sarbide orokorra murriztu dela ikusi da. Hala ere, ikasleek askotan bisitatzen dituzte “ez-hezitzaile” bezala izendatutako guneak, bereziki gauean. Youtubek protagonismo berezia hartzen du, ikasleek gehien bisitatzen duten plataforma baita, eta Adimen Artifizialaren erabilera (ChatGPT bezalako tresnak) gero eta ohikoagoa da DBHko azken ikasturteetan.
Egoera hau kontuan hartuta, eta ikasleen ohitura osasungarriak sustatzeko asmoz, ikastolak prebentzio neurri batzuk hartu ditu, familiekiko lankidetzan oinarrituta. Hauen artean, Blocksi plataforma martxan jarri da, Interneterako sarbidea kudeatzeko tresna. Plataformak hiru erabilera-profil ditu: administratzailea, irakaslea eta familia, eta sarbidea beharretara egokitzeko aukera eskaintzen du.
Modu honetan, San Fermin Ikastolak familia eta ikastetxearen arteko lankidetza indartu nahi du, pantailen erabileraren kudeaketa egokia denon erantzukizuna dela azpimarratuz. Neurri hauek ikasleen ongizatea sustatzeko asmoz hartu dira, teknologiaren erabileran oreka osasungarria bultzatuz, baina gaur egungo errealitate teknologikoetara egokitutako hezkuntza berritzailearekin dugun konpromisoa galdu gabe.
Batxilergoko 2. mailako ikasleek, berriz, erronka berezi bati heldu zioten joan den azaroan: 24 orduz mugikorrik gabe bizitzea. Borondatezkoa zen ekimena, eta parte hartu zuten ikasleek haien mugikorrak irakasleen ardurapean utzi zituzten. Aldi berean, irakasleek koaderno batzuk banatu zizkieten ikasleei, esperientzian izandako bizipenak eta hausnarketak bertan jasotzeko. Ikasleentzat ez zen ariketa erraza izan. Batzuek aitortu zuten mugikorrik gabe egoteak antsietatea sortu ziela hasieran, nahiz eta lasaitasuna ere sentitu zuten, 24 orduko epea amaitzerakoan, berriro eskura izango zutela jakinda. Beste ikasle batzuk, berriz, mugikorra hainbat eguneroko zereginetarako erabiltzen dutela konturatu dira.
Hausnarketa hauek gelan partekatu eta eztabaida interesgarriak sortu ondoren, tresna honen erabilera egoki baterako dekalogo bat diseinatzen hasi ziren. Ekimenak hausnarketa eta ikaskuntza baliotsuak ekarriditu, eta sakelekoaren erabilera arduratsuagoa sustatzeko urratsa izan dugu. Baina gai honen inguruan, bai hezitzaileentzat, bai ikasleentzat, oraindik lanketa handia egin beharra dagoela ere agerian geratu da.
_20191009131205Log.jpg)
