TAFALLAKO IKASTOLAK HERRIARI ELKAR(R)EKIN

Elkar(r)ekin Tafallako Ikastolak 0-3 urte bitarteko familientzat martxan jarri duen eskaintza berria da ikastolan bertan egingo diren tailer desberdinen bidez parte hartu eta disfrutatzeko helburuarekin. Hitzak dioen bezala denok “elkar” “ekitea” du helburu, hau da, ikastola komunitateaz haratago Tafalla eta inguruko familiekin harremana sustatzeko espazioa eskeintzea du jomuga.

Familian jolastu eta gozatzeko xedearekin ikastolak bere ateak irekitzen ditu, esperimentazioa eta berdinen eta familien arteko harremanak sustatzen dituen proposamen ludikoekin, hau guztia gertutasun eta konfidantzazko giroan.

Bizitze gune honetan haurrek beren senak erlaxatu, erregulatu eta autoeraikitzen dituzte. Haurrak beraien bizitzako lehenengo urteetatik barruan daramatzaten sen eta emozioak pizteko prest daudelaren sinismenean horretara bideratutako tailer bereziak proposatzen dira proposamen sentsorial desberdinekin.

Parte hartzea irekia da, hau da, ez da ikastolako hezkuntza komunitatera mugatzen. Interesa duen edonork izena eman dezake aurrera eramaten diren deialdi desberdinetan.

Tafallan 0-3 urteko haurrentzat dagoen euskarazko eskaintza bakarra bihurtzen da, gure ikastola beste behin euskararen arnas gune bihurtuz. Ikastolak herriarekiko eta euskararekiko duen konpromisoaren adibide bihurtzen da, aurrera eramaten dituen bestelako ekimenekin batera.

UDAZKENEKO TAILERRA

Lehenengo tailerra udazkenari buruzko izan zen. Guztira hogeita lau familia bildu ziren aurrera eramandako hiru deialdietan giro goxo eta hurbilean. Adin tarte desberdinetako haurrak egonik adinari egokitutako proposamen desberdinak aurrera eraman ziren: esperimentazio mahaia, udazkeneko ibilbideak, eskulanen txokoa, luparekin behaketak, ukitu eta sentitzeko gunea, hostoak gora botatzeko espazioa, sentipen gunea eta liburutegia. Gune desberdinetan bost zentzumenak pizteko aukera izan zuten, ikusmena, entzumena, ukimena, usaimena eta dastamena. Naturarekin lotutako material desberdinen bidez (pinaburua, hostoak, adarrak, enborrak, frutak…) udazkenean murgildu ziren haur bakoitzak soinu, testura eta usain desberdinetan sakonduz.

Modu liluragarri batean familiek kalitatezko denboraz disfrutatu ahal izan zuten haien seme-alabekin udazkeneko musikaren babespean.

HAUR HEZKUNTZAKO ESPAZIOAK

0-3 urte bitarteko tailerrak bat datoz gure ikastolak aurrera eramaten duen ildo pedagogikoarekin. Tafallako Ikastolan haur bakoitza pertsona bezala hartzen da, ahalmen, zailtasun, desio, beldur eta ametsez beteriko altxor bat bezala. Konfiantzaren pedagogian oinarrituta gizartea eraldatuko duten pertsonen garapena da Ikastolaren konpromezua, hau da, konfiantzazko giro batean haur bakoitza bere bide propioa egiteko gai dela sinisten dugu. Haurra erdigunean kokatzen da bere ikaskuntza prozesuaren protagonista bilakatuz.

Tailerretan eskaintzen den konfiantzazko eta gertutasun giroa bat dator goizean goiz Haur Hezkuntzan aurrera eramaten den espazioen antolaketarekin. Haur Hezkuntzako lehenengo bi saioetan gela bakoitza espazio batean bilakatzen da bertara adin tarte desberdineko ikasleak askatasunez mugitzen direlarik, txikiek helduengandik ikasiz: mugimendu espazioa, espazio sinbolikoa, sormen eta esperimentazio espazioa eta pentsamendu matematikorako espazioa.

Haurrak kokatzen dira erdigunean eta haiek dira erritmoak markatu eta denborak kudeatzen dituztenak. Konfiantzazko giro lasaiean haurrek egoera desberdinen bidez beren beharrei erantzuten diete. Espazio desberdinetan aurkitzen dituzten proposamen, txoko eta materialei esker bere osotasunean garatzen dira, bai alderdi afektiboan, bai fisikoan, bai emozionalean baita kognitiboan ere.

Haur Hezkuntzako etaparen garrantziaz kontziente izanik eta bizitzako lehenengo urte hauetan haurren etorkizuneko oinarriak finkatzen direla kontuan harturik bai 0-3 urteko tailerrek baita Haur Hezkuntzako 3-6 urteko antolakuntza metodologikoak bat egiten dute kalitatezko eta konfiantzazko marko pedagogikoan.