Liburuaren Eguna modu gogoangarrian ospatu zute Lizarra Ikastolako ikasleek, Euli-giro izenburupean, Uxue Alberdi autore ezagunaren lanak jendaurrean irakurriz .
Irakurle gazteen energiak atmosfera dardararazi zuen. Beren ahotsen gogoberotasunak pertsonaiei eta euren aurrean azaltzen ziren istorioei bizitza eman baitzien. “Euli-giro”-ko narrazioen hautuak, Alberdiren kalitate literarioarekin esperientzia aberastearekin batera, euskararen balio eta aniztasun kulturala nabarmendu zuen; arbasoen hizkuntzaren sakontasunean murgiltzera gonbidatuz.
Saio bukaeran, une berezia izan genuen: Uxue Alberdi idazlearen beraren zorion-mezua, Lizarra Ikastolako ikasleek egindako ekimenagatik esker ona eta mirespena adieraziz. Haren mezuak irakurle gazteekin oihartzuna izan zuen; eta berretsi egin zuen topaketa horrek eskola-ekitaldi gisa ez ezik, literaturaren, kulturaren eta gazteriaren arteko lotura-egintza gisa ere duen garrantzia.
Ospakizun hori, euskarazko literaturaren omenaldi bat izatearekin batera, asmo-adierazpen bat ere izan zen. Ekimen honen bidez, Lizarra Ikastolak euskarazko irakurketaren kultura sustatu nahi du; adimen eta espirituari dakarzkion berezko onurak aitortu eta baloratuz. Ikasgeletatik haratago, gizarte osoarekin partekatu nahi da liburuekiko maitasuna; irakurzaletasunaren eta grinaren haziak komunitateko txoko guztietara zabalduz.
Ekitaldiak, ikasleen eta euskarazko literaturaren arteko loturak indartu, eta idatzizko hitzaren bidez gure kultura-oinordetza gordetzearen eta sustatzearen garrantzia gogorarazi zigun. Gero eta digitalizatuagoa dagoen mundu honetan, itxaropenaren itsasargi dira horrelako; irakurketaren artea, oraindik ere, landu eta partekatu beharreko altxor neurrigabea dela gogoraraziz.
Lizarra Ikastolak antolatu zuen Liburuaren Eguna eskola-ekitaldia baino askoz gehiago izan zen: hitzaren edertasunaren omenaldia izan zen, euskal kulturaren aberastasunari omenaldia eta irakurketaren ahalmen eraldatzailearekin hartutako konpromiso berritua.
“Oso esperientzia aberasgarria izan da”
Amaiur Elbusto, Noah Fuentes eta Nahia Monterrubio ikasleek Liburuaren Egunean ospatu genuen ekitaldian parte hartu zuten, eta bere bizipenak kontatu dizkigute. Urduritasunak urduritasun, jendaurrean irakurtzearen esperientziatik irakaspen ugari atera dituztela esan daiteke, zalantzarik gabe.
Nola bizi izan duzu esperientzia hau?
Amaiur Elbusto– Ondo. Esperientzia berezia eta ez-ohikoa izan zen. Gustora sentitu nintzen. Noah Fuentes– Hasieran urduri nengoen, besteen aurrean irakurtzeak presioa eragin zidan. Gero, lasaitu egin nintzen, eta uste nuena baino errazagoa izan zen. Gustura geratu nintzen. Nahia Monterrubio– Besteen aurrean hitz egin behar dudan bakoitzean urduri jartzen naiz. Oraingoan kezka handia nuen, hitz batzuk ahoskatzea zaila egiten zitzaidalako. Hala ere, irakurtzen hasi orduko lasaitu nintzen, eta erabat erlaxatua bukatu nuen ekitaldia.
Zer iritzi duzu ‘Euli-giro’ obraren inguruan?
(A.E.)– Pasarte bereziak kontatzen dituen obra da. Batzuetan iluna iruditu zait; narrazio batean euliek etxe bat hartzen bukatzen dute, adibidez. (N.F.)– Oso liburu berezia iruditu zait. Kontakizun batzuk sinpleak diruditen arren, bidean bihurritu egiten dira. Euskara ondo menperatu behar da istorioak ondo ulertzeko. Helduentzako obra dela esango nuke. (N.M.)– Oparia izeneko narrazioa gogoratzen dut bereziki. Bertan kontatzen den istorioa azpimarratuko nuke. Hitz batzuk zailak edo ezezagunak egin zaizkit, eta agian horregatik, helduek hobe ulertuko dutela pentsatzen dut. Zer ikasi duzu ekitaldi honekin? (A.E.)– Hobeto irakurtzen lagundu didala uste dut. Ez dugu ozenki irakurtzeko ohiturarik, eta praktika honek hobeto irakurri eta testuak osotasunean ulertzen laguntzen du. (N.F.)– Bakarka irakurtzen dudanean oso azkar irakurtzeko joera dut; eta ekitaldi honekin nire ozeneko irakurketa abiadura horretan mantentzeko zailtasunak ditudala ohartu naiz eta beste abiadura egokiago bat izaten behartu nau. Bestalde, besteen aurrean irakurtzea, nire lotsak eta beldurrak gailentzeko erronka polita izan da. (N.M.)– Ekitaldi honekin hainbat hitz berri ezagutu eta ikasi ditut. Besteen aurrean hitz egiterakoan ziurtasuna irabazi dut. Ikasleak horrelako esperientzia aberasgarri batean parte hartzen animatuko nituzke.
_20191009131205Log.jpg)
